ILOILO CITY- Nagkitaay sa pinakauna nga kahigayunan humalin sang nabungkag ang ila alyansa sanday Iloilo City Mayor Jerry Treñas kag Lone District Representative Julienne Baronda.
Natabo ini sa groundbreaking ceremony sang 15-storey Medical Arts and Multi-Specialty Tower sa West Visayas State University Medical Center, Iloilo City.
Sa interview sang Bombo Radyo kay Mayor Treñas, iya ginkumpirma nga nagbeso- beso sila sang kongresista.
Suno sa alkalde, wala man siya sang malain nga nabatyagan kay Baronda apang may mga butang lang nga wala sila nag-intindihanay.
Wala naman nakaistorya ang duha apisar updanay sila sa lamesa.
Sa interview naman sang Bombo Radyo kay Baronda, iya ginpahayag nga ginpalapitan niya ang alkalde apang wala gid man sila nakaistorya bangud sang amo nga tion, nagaumpisa na ang programa.
Sa tunga naman nila ni USWAG Ilonggo partylist Representative Jojo Ang, gin- athag ni Baronda nga wala man sang problema sa ila nga duha.
