Nagguwa sa resulta sang isa ka survey nga 43% sang mga Pinoy ang pabor nga makighimbon ang Pilipinas sa Estados Unidos sang Amerika kun tensyon sa West Philippine Sea ang pagahambalan.
Sa ginpatigayon nga survey sang Oculum Research and Analytics sang Pebrero 21-Pebrero 29 subong nga tuig, yara sa 3,000 ka Filipinos ang nagpasakop sa face-to-face interviews kun sa diin ang sampling error margin ang yara sa ± 2 kag high confidence level nga 97%.
Sandig pa sa survey, tres porsyento lamang sang respondents sa Pilipinas ang dapat nga magpabor sa China sa territorial dispute.
Ang 40% ang nagapabor sa iban nga mga pungsod nga dapat updan sang Pilipinas magluwas sa US kag Beijing samtang 15% naman ang indi sigurado sa ila nga sabat.
Sa amo pa nga survey, nagaguwa man nga nga US amo ang most trusted country para sa mga Pinoy nga nakakuha sang 75% trust rating sa respondents; ginasundan sang Canada nga may 69%; Australia nga may 65%; Japan nga may 59%; kag United Kingdom nga may 58%.
Ang China naman ang may lowest trust rating nga 17% kag ang pinakamataas nga distrust rating nga 38%.
Ginpahayag nga ang manubo nga lebel sang pagsalig sa China kag ang mataas nga lebel sang wala pagsalig sa amo nga pungsod ang posible maangot sa geopolitical tensions, economic competition, territorial disputes, kag mga kahangawa sa political kag human rights issues.
