Indi lamang kaso-kriminal ang atubangon kundi mahimo pa pahalinon sa serbisyo ang duha ka mga pulis nga nadakpan sang ila tagsa ka partner nga nagapakighilawas sa sulod sang salakyan sa parking lot sang isa ka mall sa Barangay Canlubang, Calamba City, Laguna.
Ang nadakpan sa akto sang pagkakighilawas amo ang 40-anyos nga police master sergeant nga may asawa man nga police master sergeant.
Ang kaupod sini amo ang babaye nga police executive master sergeant nga na-assign sa Calamba City Police Station kag asawa man sang isa ka police major.
Ginpahayag nga nakabaton sang impormasyon ang tagsa nila ka partner nga may relasyon ang duha ka pulis kag ulihi nga nakit-an sa parking lot sang mall.
Sang ginkadtuan, didto na nadakpan ang ila pagpakighilawas sa sulod sang sports utility vehicle.
Natabo ang kumprontasyon kag nagtuyo pa nga magpalagyo ang lovers, apang sang ulihi, mismo ang babaye nga pulis ang nagtiro sa iya bana sa iya nga tiil kag abaga.
Ginlagas naman sang police major ang iya asawa apang nakapalagyo ini pakadto sa direksyon sang Batangas kag subong subject na sang manhunt.
Nagapadayon naman ang pagbulong sa lalaki nga pulis sa ospital.
Ang nadakpan nga lovers ang nagapangatubang sang kaso nga adultery kag concubinage.
