Patay ang lima ka tawo matapos nga naglaslas ang buhawi sa syudad sang Guangzhou sa China.
Suno sa China Meteorological Administration, natabo ini ‘las tres sa hapon sa Baiyun district sang Guangzhou kun sa diin masobra man sa 140 ka mga factory buildings ang naguba.
Magluwas sa mga napatay, 33 ka mga tawo ang nasamaran.
Ini nga buhawi ang kadungan sang indi man kinaandan nga pagbaha sa probinsya naman sang Guangdong kun sa diin apat naman ang patay,10 ang missing, kag linibo ang kinahanglan magbiya sa ila nga mga balay.
Antes sang buhawi, nagpaguwa man ang syudad sang thunderstorm, rainstorm, hailstorm kag tornado warnings sa madamo nga distrito.
May hailstones naman nga daw mga itlog kadaku nga naghalit sa mga bintana sang salakyan sa pila ka parte sang Guangzhou districts sang Zengcheng kag Panyu.
Bangud sa malain nga tyempo, napilitan man ang otoridad nga ikanselar anay ang pila ka flights sa airport sa Guangzhou nga isa sa pinakamasako nga paluparan sa China.
(Photo Courtesy: Parker Zheng/China Daily)
