Gin-suspinde sang Department of Education (DepEd) ang face-to-face classes sa tanan nga pampubliko nga eskwelahan sa bilog nga pungsod subong nga adlaw, Abril 29, tubtub buwas, Abril 30, bangud sa tuman nga init sang tyempo kag kadungan man sang ginapatuman nga transport strike.
Ginmandu sang ahensya ang pag-implementar anay sang distance learning sa sini nga mga inadlaw kun sa diin indi man required ang mga teaching kag non-teaching personnel sa public schools nga magbalik gid sa ila nga mga trabaho sa eskwelahan.
Ang anunsyo nga ini ang kaangot sa latest forecast sang state weather bureau nga masobra 30 ka areas sa pungsod ang maka-eksperyensya sang heat index nga 42 tubtub 51°C ukon yara na sa danger level.
Magluwas diri, ginalantaw man nga rason ang tatlo ka adlaw nga nationwide strike sang PISTON halin subong nga adlaw tubtub sa Mayo 1 bilang protesta batok sa Abril 30 nga deadline sang consolidation sang jeepney franchise para sa public utility vehicle modernization program (PUVMP).
Indi covered sang sini nga advisory sang DepEd ang mga pribado nga eskwelahan sa pungsod apang may option man sila nga sundon ini.
Suno pa sa ahensya, mahimo dayunon ang mga naka-schedule nga aktibidad kaangay sang Regional Athletic Association Meets kag iban pa nga division ukon school level programs sa kondisyon nga may mga nagakaigu nga safety measures para sa mga magapasakop.
Sa Iloilo City, gin-anunsyo naman ni Mayor Jerry Treñas nga suspendido ang face-to-face classes sa tanan nga public kag private schools sa tanan nga lebel subong nga adlaw MAGLUWAS lang sa mga eskwelahan nga may yara sang air-conditioned nga mga kuwarto.#
