Naglab-ot sa 53 degrees Celsius ang heat index sa Iba, Zambales kahapon, Abril 28.
Ini nga kapaang nga nagatupa sa “extreme danger” amo ang pinakamataas nga na-rekord sa Pilipinas subong nga tuig.
Sa record sang Philippine Atmospheric, Geophysical and Astronomical Services Administration (PAGASA) sa nagligad nga apat ka adlaw, yara pa lamang sa “danger level” ang kapaang sa amo nga lugar ukon yara sa 42 ukon 43 degrees Celsius.
Subong nga Lunes kag buwas nga adlaw sang Martes, base sa forecast, maganubo-nubo ang heat index sa Iba ukon yara sa 42 tubtub sa 43 degrees nga balik naman sa “danger level”.
Ginakahangaw-an man ang mangin sitwasyon sa Dagupan City, Pangasinan kun sa diin gina-forecast nga 47 degrees Celsius ang heat index subong nga adlaw.
Base sa forecast sang PAGASA, posible nga maglawig pa tubtub sa tunga-tunga sang Mayo ang amo sini kainit nga tyempo sa Pilipinas.#
