ILOILO CITY- Nagresulta sa pagpangbuno ang pagbaisay sang isa ka taxi driver kag isa ka driver sang kotse sa Lopez Jaena Street, Jaro, Iloilo City.
Ang biktima amo si Eduardo Alfaran, 57, sang Javellana, Jaro, Iloilo City samtang ang suspek naman amo si Jason Daquelaña,32, sang Tapaz, Capiz kag driver sang taxi unit sang Daily Driven Transport.
Sa interview sang Bombo Radyo kay Police Chief Master Seargent Arniel Villarante, imbestigador sang Jaro Police Station, iya ginpahayag nga gin-cut sang taxi driver ang awto kag sa mayo nga palad, nakapreno gilayon ang kotse kag wala nalab-ot ang taxi.
Suno kay Villarante, ginlagas sang driver sang kotse ang taxi kag ginpanaugan agud kumprontahon ang taxi driver.
Ginpahayag nga sang nanaug ang taxi driver, may dala ini nga kutsilyo kag sang nag-init ang ila baisay, didto na niya ginbuno ang biktima nga naigo sa tuo nga abaga.
Hugot naman nga ginpanginwala sang taxi driver ang alegasyon batok sa iya kag nanindugan nga wala ini sang dala nga kutsilyo.
Desidido naman ang biktima nga magpasaka sang kaso batok sa driver sang taxi nga yara na subong sa kustodiya sang Jaro Police Station.
Gin-suspend naman sang tagdumalahan sang taxi company ang driver.
Nahibaluan nga isa ka semana pa lang nga naga-drive sang nasambit nga taxi unit ang suspek.
