ILOILO CITY- Gin-ako sang isa ka Information Technology expert nga mabudlay ang pag-detect sang peke nga mga audio nga produkto sang Artificial Intelligence.
Ini may kaangtanan sa naggwa nga deep fake ukon gin-manipula nga audio ni President Ferdinand Marcos Jr. kun sa diin mabatian nga may yara na sang go-signal halin sa iya para gamiton sang mga suldado ang pwersa sini batok sa China.
Sa interview sang Bombo Radyo kay Mr. Francis Cruz, iya ginpahayag nga kun ano kahapos ang pag-produce sang peke nga mga audio, mabudlay naman ang pagtumod sini.
Suno sa iya, halos wala sang indikasyon nga mahimo basehan ilabi na sang ordinaryo nga tawo kun ang ila mabatian ang matuod ukon gin-manipula lang nga tingog.
Pahayag ni Cruz, ang pinakamaayo nga buhaton amo nga kun may yara sang kaangay nga hitabo, gilayon nga magpagwa ang concerned agency ukon mga tawo sang anunsyo agud mapaandaman ang mga tawo kag makorihiran ang sala ukon peke nga mga impormasyon.
