Magapatigayon sang hearing ang committee on basic education sa Senado subong nga adlaw, Abril 30, agud nga madiskusyunan ang epekto sang tuman nga init sa mga klase sang estudyante.
Ini kasunod sang anunsyo sang Department of Education (DepEd) nga suspendihon ang face-to-face classes sa tanan nga mga pampubliko nga eskwelahan sa pungsod halin kahapon, Abril 29, tubtub subong nga Martes bangud sa tuman nga init kag masobra 30 ka mga lugar sa pungsod nga yara na sa delikado nga lebel ang heat index.
Sandig naman sa forecast sang PAGASA, posible nga magalawig pa tubtub sa tunga-tunga sang bulan sang Mayo ang amo sini kainit nga tyempo nga ginpalala pa sang El Niño phenomenon.
Lakip man istoryahan subong nga Martes amo ang kabudlayan sa Alternative Delivery Modes (ADMs) kaangay sang kulang nga internet access kag kulang sang suporta sang mga ginikanan sa remote learning bangud sila na mismo ang nagamato-mato sabat sa ulubrahon sang ila kabataan.
Sang 2023, may survey ang Alliance of Concerned Teachers (ACT) kun sa diin naggwa sa resulta nga 87% sang mga manunudlo ang nagsiling nga nabudlayan ang ila nga mga estudyante sa pagtutok sa leksyon bangud mapaang.
37% naman ang nagsiling nga ang tuman nga init ang naga-trigger man sa pila ka pre-existing medical condition.
Mangin si Senate President Juan Miguel Zubiri ang nag-intra naman sa pagpanawagan sa DepEd kag sa Commission on Higher Education nga magbalik na sa pre-pandemic calendar sa maabot nga school year sa baylo sang gradual return sa SY 2025-2026.#
(PNA photo by Robinson Niñal Jr.)
