ILOILO CITY- Nagpabutyag ang madamo nga mga pungsod sang ila pagkabalaka para sa Pilipinas kasunod sang pinakaulihi nga pagbomba sang water cannon sang barko sang China Coast Guard sa Philippine Coast Guard vessel sa West Philippine Sea kag gintawag ini nga tuman ka delikado.
Suno kay Japanese Ambassador Kazuya Endo, isa ka masubo nga adlaw para sa mga Filipino nga manugpangisda ang ginhimo sng China nga pagbalabag sa humanitarian mission agud alalayan ang mga manugpangisda sa ila fishing grounds.
Suno naman kay European Union Ambassador to the Philippines Luc Veron, nagalapas sa international law ang akto sang China bangud nga ang agresibo sini nga tikang ang dako nga pamahog sa kabuhi sang mga tawo sa kadagatan.
Ginpahayag naman ni Ambassador MaryKay Carlson nga padayon ang pagdampig sang Estados Unidos sa Pilipinas sa pagtib-ong sang freedom of navigation kag international law.
Ginkondenar naman ni British Ambassador Laure Beaufils ang lihok sang China.
Sa bahin naman sang New Zealand Embassy, nagpanawagan ini sang matawhay nga resolusyon nga nagasunod sa United Nations Convention on the Law of the Sea, kun sa diin ang China kag Pilipinas ang lunsay signatories.
Matandaan nga kahapon,samtang padulong ang BRP Bagacay sa Bajo de Masinloc, nga kilala man nga Scarborough Shoal ukon Panatag Shoal, upod sa Philippine civilian vessels para sa supply mission sang gin-igo sila sang Chinese ships.
Nag-angkon ang Bagacay sang damage sa wala nga porsyon samtang ang canopy sa likod sang barko ang naguba man.
