ILOILO CITY- Tuman ang pagpasalamat sang mga residente sang Iloilo City sa Bombo Radyo Philippines Foundation, Incorporated kag Flowater Resources Iloilo, Incorporated sa paghatag sang potable water ukon matinlo nga mainom nga tubig.
Sa interview sang Bombo Radyo Iloilo kay Punong Barangay Karl Smith De La Peña sang San Jose, Iloilo City Proper, iya ginpahayag nga dako nga bulig ang nasambit nga tubig ilabi na nga yara sa state of calamity ang syudad bangud sa water shortage.
Suno kay De La Peña, madamo nga mga residente, indi lang sa ila nga barangay kundi sa iban pa nga mga lugar ang nagasentimento bangud sa problema sa mainom nga tubig.
Dako nga pasalamat man nila bangud magluwas sa libre nga tubig, nahatagan pa sila sang water tank nga amo ang butangan sang mainom nga tubig para sa ila nga mga residente.
Nahibaluan nga kabilugan nga 10,000 cubic meters ukon 10 million liters sang ilimnon nga tubig ang ipanghatag sa syudad halin sa planta sang Flowater Resources Iloilo Incorporated sa Barangay Nanga, Pototan, Iloilo.
