Ginpakita sang pinakaulihi nga water cannon incident sa West Philippine Sea nga posible mangin ‘patal’ ang pagka-agresibo sang China sa mga barko sang Pilipinas — buot silingon, posible “mangin rason sang kamatayon.”
Ginpahayag ini sang Philippine Coast Guard (PCG) kasunod sang natabo sang Martes nga pag-bomba sang China Coast Guard sang tubig sa civilian vessels sang Pilipinas nga pakadto sa Panatag Shoal para kuntani sa supply mission.
Suno kay PCG spokesperson Commodore Jay Tarriela, kun tan-awon ang halit nga natuga kaangay sang pagtiko sang railing sang barko sang PCG bangud sa tuman ka baskog nga pagbomba sang tubig sang China, posible nga tuman ini ka delikado kag makapatay.
Matandaan nga sang natabo sang Martes kun sa diin nagpang-bomba sang tubig ang duha ka mas daku nga barko sang China, na-damage ang canopy kag steel railing sang BRP Bagacay.
Wala man ginpalampas sang Chinese vessels kag gin-water cannon man ang BRP Bankaw nga amo ang vessel sang Bureau of Fisheries and Aquatic Resources (BFAR) nga parte man sang supply mission.
“It just goes to show that Goliath is becoming more Goliath, they don’t hesitate to use brute force to violate international law,” suno kay Tarriela.
Sang amo nga tion, nagpundo pa ang duha ka vessels sang Pilipinas agud nga i-check kun ano kadaku ang halit, apang padayon nga nag-ikog sa ila ang CCG kag ang Chinese Navy ship.
Nagpadayon sang ulihi ang Philippine vessels sa mission 80-kilometros ang kalayuon halin sa Panatag Shoal. Amat-amat naman nga nagkadto ang fishing boats sang mga Pinoy nga manugpangisda agud nga makakuha sang libre nga krudo kag iban pa nga mga suplay.
Ginpasalig naman sang PCG nga indi ini malingkang kag padayon ini nga magahatag sang suplay sa mga Pinoy nga manugpangisda sa West Philippine Sea apisar sang ginhimo sang China.
‘KUN MAY MAPATAY NGA PINOY SA WPS’
Matandaan nga sang Abril, nagbuya si President Ferdinand Marcos, Jr. nga mangayo na ini sang bulig sang Estados Unidos sang Amerika kun may Pilipino nga mapatay sa atake sa West Philippine Sea.
Sabat ini ni Marcos sang ginpamangkot kun gamiton bala ang Mutual Defense Treaty sa tunga sang Pilipinas kag Amerika sa tunga sang padayon nga pagpang-harass sang China sa mga Pinoy kag mga barko sang nasyon sa amo nga teritoryo.
Ini nga treaty — nga ginpirmahan sang Pilipinas kag Amerika sang 1951 — ang isa ka defense pact nga nagasaad nga mahimo makabuligay ang duha ka nasyon sa depensa kun may mga pagpang-atake nga matabo.
Sa idalom sang Article IV, nakasaad nga ginakabig sang Pilipinas kag US ang anuman nga armado nga pagpang-atake sa Pacific area sa bisan sin-o sa ila nga delikado na para sa kalinong kag safety sang nasyon. Sa idalom sang Article V, natumod man nga covered sang treaty ang armado nga pagpang-atake sa metropolitan territory sang Pilipinas man ukon Amerika, ukon ang island territories sa idalom sang ila hurisdiksyon sa Pacific Ocean, ukon ang pagpang-atake sa armed forces, public vessels, ukon aircraft sa Pacific.#
