Apisar sang tuman ka init nga tyempo subong nga summer nga ginpalala pa sang El Niño phenomenon, posible nga may tubtub duha ka bagyo nga magasulod sa Philippine Area of Responsibility sa bulan sang Mayo.
Suno sa Philippine Atmospheric, Geophysical and Astronomical Services Administration (PAGASA), kun magporma gid man ang bagyo, duha ka posible nga tracks ang gina-forecast sang climatology department — una amo ang near-shore landfall antes ini maghulag palayo sa Pilipinas.
Ang ikaduha nga track ang ang pagporma ukon pagsulod sa eastern section sang Mindanao kag magapalapit sa Cagayan Valley, Eastern Visayas, Bicol Region Mimaropa, kag mga parte sang Calabarzon antes ini magbiya sa PAR.
Pahayag pa sang state weather bureau, wala pa subong sang na-monitor nga low pressure area kag wala man ginalauman nga makasulod sa Pilipinas sa masunod nga semana.
Nahibaluan nga ang tuman nga init sa Pilipinas ang rason sang suspensyon sang face-to-face classes kag adjustments sa oras sang trabaho sa gobyerno. Ginalantaw nga magalawig tubtub sa tunga-tunga sang Mayo ang amo sini kapaang nga tyempo.
