Ginsuguran na sang partido ni President Ferdinand Marcos Jr. nga Partido Federal ng Pilipinas (PFP) ang preparasyon sini para sa 2025 midterm elections paagi sa pagpakig-angot sa iban nga national political parties para sa potensyal nga alyansa.
Kahapon sang ginpangunahan man ni Marcos ang induction sa 33 ka mga bag-o nga myembro sang partido kun sa diin nalakip ang 11 ka gobernador, 13 ka bise gobernador, kag tatlo ka mga mamalidha.
Nalakip man sa mga nagtambong amo sanday Iloilo Governor Arthur Defensor, Jr. kag Guimaras Vice Governor Atty. John Edward Gando.
Mismo si Marcos man ang nag-mensyonar sa iya speech nga possible nga may alyansa sa Lakas-Christian Muslim Democrats (Lakas-CMD), Nationalist People’s Coalition (NPC) kag sa National Unity Party (NUP).
Ang Lakas amo ang pinakadaku nga partido sa Kongreso kun sa diin myembro si House Speaker Martin Romualdez kag si former president Gloria Macapagal Arroyo.
Posible man nga magpakig-angot ang partido sa Hugpong ng Pagbabago nga regional party ni Vice President Sara Duterte kag indi man sirado ang ganhaan sa possible nga partnership.
Matandaan nga tandem ang Marcos kag Duterte sang 2022 nga nag-resulta sa landslide victory. Indi pa maathag subong kun mapabilin tubtub sa 2025 ang Uniteam sa pihak sang maathag nga mga senyales nga may crack na sa relasyon sang mga Duterte kag Marcos.
