LEON, ILOILO – Ipaidalom pa sa autopsy examination ang bangkay sang duha ka mga rebelde nga napatay sa engkwentro sa boundary sang Barangay Cawilihan kag Barangay Bucari, Leon, Iloilo.
Ini amo sanday Nahum Camariosa alias Rodel/Bebong, Squad Leader sang Southern Panay Front (SPF), Komiteng Rehiyon – Panay kag residente sang Barangay Manampunay, Leon, Iloilo kag alias Junjun/Cedrick, myembro sang Regional Sentro De Gravidad (RSDG) kag residente sang Barangay Bad-as, San Joaquin, Iloilo.
Sa interview sang Bombo Radyo kay Police Captain John Predic Padilla, hepe sang Leon Municipal Police Station, iya ginpahayag nga nauna na ang mga ini nga ginkuhaan sang finger print kag ginpaidalom sa paraffin test.
Katuyuan sang autopsy examination nga matumod ang mga igo sang mga biktima nga amo ang gintunaan sang ila kamatayon.
Apang sa inisyal nga impormasyon, may igo sa ulo kag lawas si Camariosa samtang sa ulo naman ang igo ni alias Junjun/Cedrick.
Matandaan nga nag-ugat ang engkwentro sang nagpalab-ot sang reklamo ang mga residente bangud sa ginahimo nga extortion sang mga rebelde sa lugar.
Sang nagresponde ang tropa sang gobyerno, na-engkwentro nila ang indi magnubo sa 30 ka mga armado Communist Terrorist Group nga yara sa idalom sang pagpamuno ni Erber Buencuchillo alias Yamal kag ni Camariosa.
Narekober naman sa ginluntaran sang engkwentro ang mga mataas nga kalibre sang armas nga ginalakipan sang tatlo ka M16 rifles, isa ka M14 rifle, isa ka AK-47 rifle, kag isa ka anti-personnel mine.
