Ginatun-an sang national government ang posible pag-file sang separado nga diplomatic protest batok sa China matapos nakit-an nga direkta nga gin-igu sang water cannon sang Chinese Coast Guard ang flag sang Pilipinas nga yara sa civilian vessels nga pakadto sa Scarborough Shoal.
Suno sa Department of Foreign Affairs (DFA), ginausisa pa kun ang hayahay nga simbolo sang soberanya sang pungsod ang mahimo nga mangin basehan para sa bag-o nga protesta.
Ang protesta suno sa ahensya amo ang nagasugid sa posisyon sang Pilipinas nga wala ini nalipay sa ginapanghimo sang China sa West Philippine Sea. Labaw dira, ang protesta ang makabig man nga isa ka legal nga dokumento.
Nahibaluan nga nagdangat na sa 153 ka diplomatic protests ang na-file sang Pilipinas batok sa China sa idalom sang Marcos administration, apang tubtub subong, wala ini ginasapak.
Pahayag naman ni Commodore Jay Tarriela, PCG spokesperson for the West Philippine Sea, natabo na sang una ang water cannon attack apang subong, lain ang impact sini sa emosyon sang mga Pinoy bangud direkta nga gin-igu ang hayahay sang Pilipinas.
“Sa ordinaryong tao na makikita na ang bandila natin, tinitira ng water cannon ito talaga napakasakit sa atin bilang Pilipino. Doon sa question na flag ba talaga ang intentionally na target ng People’s Republic of China? We can probably say that would be possible,” suno kay Tarriela.
Samtang, sa statement naman sang Chinese Embassy in Manila, ginbuyagyag sini nga 2016 sang nag-set sang temporary special arrangement sa Scarborough Shoal ukon ang ginatawag sang China nga Huangyan Dao.
Ginsulit sang China nga sa idalom sang amo nga agreement, mahimo lamang makapangisda ang Pilipinas gamit ang gagmay nga fishing boats sa designated waters magluwas sa lagoon sang Scarborough Shoal.
Pahayag pa sang embahada, nagtuman ang Pilipinas sa amo nga agreement sa sulod sang pito ka tuig apang naggamo ini sang nagpungko si President Ferdinand “Bongbong” Marcos Jr.
Ginbasura naman sang Philippine Coast Guard ini nga statement kag nagpangabay sa mga Pilipino nga indi magpati sa himu-himo nga istorya sang China bangud luyag lamang sini nga malibog ang ulo sang mga Pinoy kag maliso ang atensyon sang tanan halin sa kun ano ang matuod nga isyu nga amo ang ila pagpang-harass sa West Philippine Sea.#
