Gina-engganyo sang Department of Education (DepEd) ang mga eskwelahan sa bilog nga pungsod nga patigayunon lamang indoors ang mga graduation kag moving-up ceremonies agud nga malikawan ang tuman nga init.
Sa idalom sang DepEd Memorandum No. 023 Series of 2024, ang end-of-school-year rites para sa school year 2023-2024 ang dapat nga hiwaton nga sulod sa petsa nga Mayo 29 tubtub 31.
Suno sa memorandum sang ahensya, para maproteksyunan ang mga kabataan, manunudlo kag ang mga tumalambong sa seremonya, dapat siguruhon sang eskwelahan nga indoor venue ini nga may maayo nga bentilasyon ukon sa covered court.
Dapat man likawan ang pag-schedule sang seremonya sa oras nga tuman ka taas ang temperature.
Pahanumdom man sang ahensya sa mga eskwelahan nga ipabilin nga simple ang seremonya kag likawan na ang tuman nga gasto kaangay sa extravagant attire kag extraordinary venues.
Gin-athag man sang department nga indi dapat compulsory kag indi dapat paghimuon nga graduation ukon completion requirement ang pag-attend sa non-academic activities kaangay sang field trips, film showings, Junior-Senior Promenade kag iban pa nga kaangay nga events.
Lakip man sa ginpahanumdom amo nga indi dapat magpanukot ang DepEd personnel para sa anuman nga sahi sang kontribusyon para sa graduation/moving-up ceremony.
Ang tema sang end of school year rites sa sini nga school year amo ang Kabataang Pilipino Para sa Matatag na Kinabukasan ng Bagong Pilipinas.”
Ini nga school year ang dapat kuntani magtakop sa Hunyo 15 apang sang nagligad nga Pebrero, nagpaguwa sang memorandum ang DepEd nga naga-adjust sang pagtakop sang school year sa Mayo 31. Ang opening kag closing dates naman sa SY 2024-2025 amo ang Hulyo 29, 2024 kag Mayo 16, 2025.#
