Wala nahangawa si anay-Presidente Rodrigo Duterte sa posibilidad nga imandu sang International Criminal Court (ICC) ang pagdakop sa iya subong nga tuig bangud sa maduguon sini nga drug war.
Ginakabig man sang iya kampo nga wala sang pulos ang arrest warrant nga posible ipaguwa sang amo nga korte nga suportado sang United Nations.
Suno sa anay Duterte officials nga amo sanday executive secretary Salvador Medialdea, presidential spokesman Harry Roque, kag chief presidential legal counsel Salvador Panelo, ang reports sa ginapahayag ipaguwa sang ICC nga arrest warrants ang indi dapat nga pagseryosohon bangud una naman nagsiling mismo si President Ferdinand Marcos Jr. nga indi ini magkooperar sa amo nga korte.
Apang sa isa ka separado nga interview, ginsiling ni Roque nga may yara siya sang masaligan nga impormasyon nga wala ginpunggan sang Marcos administration nga makasulod ang ICC investigators diri sa pungsod.
Matandaan nga sang nagligad nga adlaw, ginbuyagyag sang mabaskog nga kritiko ni Duterte nga si anay senador Antonio Trillanes IV nga maga-isyu ang ICC sang warrant kay Duterte sa tunga-tunga sang tuig; kag ipaaresto man pati si Vice President Sara Duterte kag iban pa nga naangot sa drug war “by batch”.
Una man nga gin-athag ni Trillanes nga indi tsismis ang iya ginasapubliko nga impormasyon bangud nagapakig-angot siya sa ICC representatives halin sang ginpatigayon ang preliminary examination, sang ginpatigayon na mismo ang imbestigasyon, kag tubtub nga gin-basura ang apelar ni Duterte.
