10 ka mga probinsya, nakabalay na sang ila action plans para sa West Philippine Sea
Igalunsar subong nga bulan ang provincial action plans sang 10 ka mga probinsya nga nagasakop sa kabug-usan nga stretch sang West Philippine Sea bilang suporta sa pagpaninguha sang national government sa tunga sang tensyon sa teritoryo.
Suno sa Department of the Interior and Local Government(DILG), ini nga mga probinsya amo ang Pangasinan, La Union, Ilocos Norte, Ilocos Sur, Batanes, Bataan, Zambales, Batangas, Palawan kag Occidental Mindoro.
Suno kay Interior Assistant Secretary for international relations Lilian de Leon, ini nga action plans ang nagatuyo nga mapabaskog pa ang local leadership kag panggobyerno.
Sa Batanes, lakip sa himuon amo ang mas mabaskog nga maritime security kag safety paagi sa pagbutang sang dugang nga mga sakayan.
Sa Ilocos Norte, tuyo sang probinsya nga i-capacitate ang fish wardens, magpadala sang Bantay Dagat ukon volunteer sea patrols, kag maghatag sang mas madasig nga sakayang-pandagat para sa pagpatrolya kag pagpangdakop.
Sa Ilocos Sur, nalakip ang utilization sang Armed Forces of the Philippines (AFP) reserve forces, kag mag-develop sang koordinasyon sa local government units (LGUs).
Sa La Union, iga-reorganize kag remobilize ang Provincial La Union Baywatch agud maka-establisar sang maritime substations sa baybayon sang La Union, kag mag-conduct sang regular joint seaborne patrols kag monitoring sang municipal waters.
Mangin prayoridad naman sa Pangasinan ang pag-address sa illegal, unreported kag unregulated fishing kag maritime pollution.
Gusto naman sang Zambales ang delineation sang municipal water boundaries agud mapunggan ang pagsulod sang commercial fishers.
Iga-report naman sang Bataan sa Bureau of Fisheries and Aquatic Resources (BFAR) kun mang-bully ang Chinese vessels, pabaskugon ang AFP reserve force, kag magpadayon sa pag-request sa fish aggregating devices.
Sa Batangas naman, pabor ini sa pag-establisar sang mangrove, coral kag seagrass protected areas.
Sa Occidental Mindoro, istrikto ang local kag national fishery laws.
Ini nga action plans ang maga-roll out subong nga Mayo para sa implementasyon, operationalization kag institutionalization sang agreement sa labing-una nga National Summit for the West Philippine Sea.
