ILOILO CITY- Nagapadayon pa ang ginahimo nga imbestigasyon agud makilala ang kawatan nga nagsulod sa drug store nga ginapanag-iyahan sang Archdiocese of Jaro sa Sta. Filomena Arevalo, Iloilo City.
Sa interview sang Bombo Radyo Iloilo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga gintuyo pa sang kawatan nga buksan ang roll up, apang sang wala ini natigayon, ginbuka sini ang bintana kun sa diin makit- an ang opisina sang botika.
Suno kay Oso, nataban sang kawatan ang ginabanta P50,000 nga kwarta nga nakasulod sa kaha.
Suno sa iya, wala na-remit ang kwarta sang Sabado bangud wala sang opisina ang bangko kag kahapon naman, sirado ang amo nga botika.
Nagapati naman si Oso nga residente lang sa lugar ang kawatan.
Nagpanawagan man ini sang bulig sang mga pulis kag mga testigo agud madasig ang pagdakop sa tawo nga nangawat sa botika.
