Napasaka na sa high alert ang status sang duha ka mga opisina sang Department of Migrant Workers (DMW) sa Taiwan kasunod sang duha ka magkasunod nga linog nga nagtay-og sa isla, Mayo 6.
Suno sa ahensya, gina-verify sa leaders, communities, employers, kag trade associations agud ma-check ang kondisyon sang mga Pinoy kag agud hibaluon kun may yara sang nasamaran.
Nagapakig-angot man ini sa Manila Economic and Cultural Office (MECO) agud masiguro ang ila nga safety.
Base sa reports sang local media sa Taiwan, una nga nag-igu ang magnitude 5.9 nga linog 5:45 p.m. kag pito ka minutos lamang ang nagligad ukon 5:52 p.m., nagsunod man ang magnitude 5.9 quake.
Suno pa sa Central Weather Administration, ang epicenter sang una nga linog ang 26 km south sang Hualien County Hall, samtang 27.8 km south sang Hualien County Hall naman sa ikaduha nga pagtay-og.
Wala pa sang reported damage ukon injured as of press time.
Matandaan nga sang nagligad nga bulan, na-rekord man ang magnitude 7.2 nga linog sa Taiwan nga amo ang pinakamabaskog nga pagtay-og sa maragtas sang isla sa sulod sang 25 ka tuig.#
