ILOILO CITY- Pila ka adlaw matapos ginbuyagyag sang China ang ginaalegar nga kasugtanan sa Western Command (Wescom) sang Pilipinas kaangot sa pagdumala sa tensiyon sa West Philippine Sea, nag-leave ang commander sini nga si Vice Admiral Alberto Carlos.
Ginkumpirma sang militar nga nag-file sang “personal leave” si Carlos.
Suno kay Armed Forces of the Philippines spokesperson Colonel Francel Padilla, wala ini sang kahilabtanan sa claim sang China nga ang Wescom amo ang nagsulod sa “new model” nga kasugtanan para sa management sang sitwasyon sa Ayungin Shoal sa una nga mga bulan subong nga tuig.
Ang Wescom ang may jurisdiction sa West Philippine Sea kalakip na ang Ayungin Shoal.
Si Rear Admiral Alfonso Torres Jr., commander of the Naval Education, Training and Doctrine Command, amo anay ang magapungko bilang acting commander sang Wescom.
Matandaan nga ginpahayag sang Chinese foreign ministry spokesperson Lin Jian nga ang amo nga kasugtanan ang nahimo matapos ang pila ka rounds sang discussions paagi sa diplomatic channel kag AFP WESCOM.
Gin-claim man ni Lin nga ang “new model” sa Ayungin ang may permiso ni Philippine Defense Secretary Gibo Teodoro Jr kag National Security Adviser Eduardo Año – apang ini ang ginpanginwala naman sang duha ka mga opisyal
