Ginakwestyon na ni Senate Deputy Minority Leader Risa Hontiveros kun isa bala ka Chinese citizen ang mayor sang Bamban, Tarlac nga amo ang ginaalegar naangot sa Philippine Offshore Gaming Operators (POGOs) sa Baofu Compound sa amo nga banwa.
Sa pagsulundan, ang mga Pinoy nga may iban nga lahi apang rehistrado nga botante ang ginatugutan nga makapadalagan kag mauyat sang local elective positions apang indi naman ini pwede sa mga tawo nga may dual citizenships.
Suno kay Hontiveros, may mga testimoniya nga gulpi lang naglutaw ang pangalan ni Mayor Alice Guo sang 2022 elections.
“Ayon mismo sa mga taga-Bamban, bigla na lang lumutang ang pangalan ni Mayor Alice Guo nung eleksyon noong 2022. May nakakakilala kaya talaga sa kanya sa sarili nyang bayan? Mayor Alice was catapulted to power in a small town in Tarlac, but does she have the public records that will strongly establish her identity as a Filipino national?” suno sa senadora.
Wala man ini sang school records bangud naka-home school ini halin sang elementarya tubtub sa high school kag wala na nakapadayon sa kolehiyo. Mangin ang pag-rehistro sang iya pagkabun-ag ang nagsugod sang naga-edad na siya sang 17-anyos.
Pahayag pa sini, nagasuspetsa siya nga nagbutig si Guo sa iya nga edukasyon bangud indi man sini mapangalanan ang home school provider.
“Ang meron tayo ay ito: Certificate of live birth. Dito naman, Filipino ang nakalagay na nationality ng tatay niya, pero sa dokumento ng embroidery business, Chinese ang nationality na naka-record. At sa kakatanong nga natin kahapon, inamin ni Mayor Alice na ‘Jian Zhong Guo’ pala ang totoong pangalan ng kanyang ama, at yung Angelito Guo ay Filipino name lang daw,” dugang sini.
Nagakatemptar na ang senadora nga ipa-contempt ang alkalde bangud sa napangbuyagyag sa hearing.
Importante pahayag ni Hontiveros nga madetermina ang nationality sang mayor bangud sa ginalantaw nga kaangtanan sini sa POGO sa Baofu compound nga amo naman ang gina-alegar nga involved sa hacking kag surveillance activities ilabi na sa websites sang gobyerno.
Naka-request na si Hontiveros sang kopya sang Statement of Assets, Liabilities, and Net Worth (SALN) kag Statement of Contributions and Expenditures (SOCE) ni Mayor Guo.
Sa masunod nga hearing sa Senado, mahimo man nga imbitaron ang Municipal Council kag ang mga residente sang banwa sang Bamban.#
