May maayo na nga lead ang Philippine National Police (PNP) kaangot sa nahamtangan sang pugante kag Kingdom of Jesus Christ founder nga si Pastor Apollo Quiboloy.
Suno kay PNP public information officer Col. Jean Fajardo, gina-verify pa nila ini nga impormasyon apang indi na makahatag sang dugang nga detalye agud nga indi masablag ang pursuit operations.
Nagalaum ang kapulisan nga husto na ang impormasyon agud maserbe na ang warrants nga gin-isyu sang korte batok sa pastor bangud sa kaso nga qualified human trafficking kag child sex abuses.
Matandaan nga ang korte sa Pasig kag Davao ang nagpaguwa sang warrant of arrest batok sa nasambit nga self-proclaimed Appointed Son of God kag sa iya lima ka iban pa nga mga sumulunod.
Sa record man sang kapulisan, nakit-an man nga ang 14 sa mga pusil nga naka-rehistro sa pangalan sang pastor ang nabaligya na sang Disyembre 30, 2023.
Matandaan nga gin-revoke ang lisensya ni Quiboloy nga magpanag-iya kag maghupot sang armas kag firearms registration bangud sa kaso-kriminal nga iya ginapangatubang nga sarang masilutan sang masobra duha ka tuig nga pagkapreso.
