Magapatuman ang Department of Foreign Affairs (DFA) sang mas istrikto nga mga pagsulundan sa pagpaguwa sang tourist visas sa Chinese nationals umpisa subong nga semana.
Ang ginatudlo nga rason amo ang pagsaka sang kaso sang cases iligal nga pag-angkon sang visa kag mga krimen nga naangot sa Philippine offshore gaming operator ukon POGO firms.
Suno kay DFA Undersecretary for civilian security and consular affairs Jesus Domingo, ang bag-o nga tourist visa requirements ang nagalakip sang social security documents nga dapat ipresentar sang visa applicants.
Gina-require man ang applicants nga magpasa sang government IDs, proof sang financial capacity, employment certificate kag bank statements.
“Our reforms are aimed largely at better security. There will be less instance of unsavory people coming in to commit heinous crimes against fellow Chinese,” suno kay Domingo.
Pahayag pa sini: “It is not related to national security issues. This is actually for the good of the Chinese because these POGO, who are their victims? The Chinese.”
Ginatumod sini ang Chinese citizens nga nagsulod sa Pilipinas bilang mga turista apang iligal nga nagtrabaho sa offshore gambling offices ukon POGOs.
Matandaan nga una na nagpanawagan si Senator Risa Hontiveros sa gilayon nga pag-ban sa POGOs sa pungsod bangud suno sa iya, makabig ang mga ini nga “hotspot of fugitives, and a haven for criminal activities.”#
