Nanindugan si President Ferdinand Marcos Jr. nga indi na kinahanglan ang loyalty check sa mga katapo sang Philippine National Police (PNP) apisar pa sang report nga may yara sang nagaplano agud pahalinon siya bilang presidente.
“Anong sasabihin mo sa tao? Loyal ka ba sakin? Siyempre, oo ‘yung sagot nun ‘di ba kahit na hindi siya loyal sa ‘yo,” suno kay Marcos.
Ginsiling man sini nga wala siya sang nabaton nga report nga may police officers nga involved sa pamulitika. Indi man importante suno sa iya kun nanamian sa iya ukon wala ang mga law enforcers.
“Basta maging professional ka at gawin mo ‘yung trabaho mo nang tama. ‘Yun lang naman ‘yung hinihiling ko sa lahat ng pulis [at] sa lahat ng armed forces,” pahayag sini.
Una na nga ginpahayag ni anay senador Antonio Trillanes nga si ex-President Rodrigo Duterte ang responsable sa likod sang destabilization plot batok sa Marcos administration.
Ini ang ginapahayag sa tunga man sang kahangawa nga arestuhon si Duterte samtang padayon ang imbestigasyon sang International Criminal Court (ICC probe) sa iya anay kontrobersyal nga drug war.
Ginbuyagyag man ni Trillanes nga ang imbestigasyon sang Senado sa gina-alegar leak sa Philippine Drug Enforcement Agency (PDEA) ang kabahin man sang “communications plan” ni Duterte sa tuyo nga higkuan kag i-implicate si Marcos sa lista sang illegal drug users.
Ginkadlawan naman ni Marcos ang report nga yara siya sa lista sang nagagamit sang iligal nga droga.
Gintawag man sini nga ‘professional liar’ si anay PDEA agent Jonathan Morales nga amo ang nagtudlo sa Chief Executive nga naangot sa drug operation sang Marso 11, 2012.
Suno kay Marcos, wala sang basehan kag wala sang pulos ang mga ginapangwakal ni Morales sa ginpatigayon nga Senate hearing sa diin na-leak ang operational documents sang ahensya nga naga-angot sa iya kag sa Diamond star nga si Maricel Soriano sa paggamit sang iligal nga droga.
“Parang jukebox ‘yan e. Basta maghulog ka ng pera, kahit anong kantang gusto mo, kakantahin niya,” pahayag ni Marcos.#
