Suportado sang National Security Council (NSC) ang panawagan ni Defense Chief Gilbert Teodoro nga pahalinon ang Chinese embassy personnel nga responsable sa pag-rekord sang gina-alegar nga pag-istoryahanay sang Chinese diplomat kag isa ka Philippine military official kaangot sa “new model” arrangement sa Ayungin Shoal.
Sa statement ni National Security Adviser Secretary Eduardo Año, ginsiling sini nga dapat na nga palayason gilayon sa pungsod ang mga indibidwal sa Chine embassy nga naglapas sa layi sang Pilipinas kag sa Vienna Convention on Diplomatic Relations.
Nagapati ang opisyal nga ang nag-rekord sa dayalogo ang nagkomiter sang seryoso nga paglapas sa diplomatic protocols kag conventions kag nagbayolar man sa Anti-Wire Tapping Act.
Gin-call out man ni Año ang embahada sang China sa Manila bangud sa ginaalegar nga pagpalapta sang disinformation, misinformation, kag malinformation. Indi na ini dapat pagpalampason suno pa sa opisyal kag dapat nga may sanction gid ukon seryoso nga penalidad.
“We emphasize that the unmistakable objective of the PRC embassy in its indiscriminate releasing of these falsehoods and smears have been, and continues to be, to sow discord, division, and disunity between and among the Filipino people,” kabahin sang statement.
Myerkules sang ginpahayag ni Teodoro nga dapat pahalinon na sa Pilipinas ang sin-o man nga nagrecord sa ginaalegar nga istoryahanay sa new model arrangement. Gintugyan man sini sa Department of Foreign Affairs (DFA) nga hibaluon ang kamatuoran.
“Ito ay iiwanan namin sa DFA na alamin ang katotohanan kung ano talaga ang nangyari at kung ito talaga ay nangyari dahil ito ay gawain di umano ng Chinese embassy mismo na paglabag sa batas ng Republika ng Pilipinas,” kabahin sang pahayag ni Teodoro.
Sang Huwebes, ginpahayag naman ni DFA spokesperson Ma. Teresita Daza nga dapat magsunod ang diplomats sa 1961 Vienna Convention on Diplomatic Relations kun sa diin nakasaad nga responsibilidad nila nga sundon ang layi kag mga regulasyon sang estado.#
