Magasugod na subong nga bulan ang validation kag ang registration sa 300,000 ka pigado nga mga pamilya nga magabenepisyo sa full implementation sang food stamp program (FSP) sang national government.
Suno kay Department of Social Welfare and Development (DSWD) Undersecretary for innovations Eduardo Punay, naka-hire na ang ahensya sang masobra 1,000 validators para sa sini nga proseso.
Indi kaangay sa iban nga food-feeding programs, ang ini nga programa suno kay Punay ang wala na naga-require sa mga benepisyaryo nga magpila sang malawig agud lang makakuha sang ayuda. Sa baylo, ila nga mabaton ang assistance paagi sa electronic beneficiary transfer cards.
Una na nga nagpain ang national government sang P1.89 billion para sa sini nga scaled-up program. Target sang sini nga programa nga makahatag sang benepisyo sa ginabanta isa ka milyon nga food-poor families sa 2027.
Ang pilot implementation sini ang nagsugod sang nagligad pa nga Disyembre 2023 kun sa diin involved ang 3,000 households kag natalana nga magtapos naman subong nga bulan.#
