Nagpaguwa sang statement ang Department of Health (DOH) nga gina-respeto sini ang desisyon sang Office of the Ombudsman nga pasakaan sang kaso nga graft si anay Health Secretary Francisco Duque III bangud sang gina-alegar nga iligal nga pagsaylo sang P41 billion para sa COVID-19 supplies procurement sang 2020.
Suno kay DOH spokesperson Albert Domingo, tahuron sang ahensya ang tanan nga legal proceedings.
Sa desisyon sang Ombudsman, gina-rekomendar man ang pagkaso sang graft batok kay anay Department of Budget and Management (DBM) Undersecretary Christopher Lao bangud sa ginpahayag nga anomalous pandemic deals.
Suno pa sa Ombudsman, guilty man sanday Duque kag Lao sa grave misconduct, gross neglect of duty, kag conduct prejudicial to the service.
Gin-abi-abi naman ni Senator Senator Risa Hontiveros ini nga desisyon sang Ombudsman nga nag-abot tatlo ka tuig matapos ang marathon hearings sang Blue Ribbon Committee kaangot sa gina-alegar anomalous medical supplies procurement sang Duterte administration.
“I would like to thank the Ombudsman for faithfully fulfilling its mandate to seek justice, especially in cases involving misappropriation of public funds and anomalies in procurement,” kabahin sang statement ni Hontiveros.
Ini nga latest development suno sa senadora ang isa man ka kadalag-an para sa publiko nga amo ang gintunto sa kasagsagan pa sang krisis sa ikaayong lawas.
Sa bahin ni Duque, ginkumpirma sini nga maga-file siya sang motion for reconsideration sa Lunes ukon sa Martes.
Matandaan nga ang imbestigasyon sang Ombudsman ang nag-ugat sa reklamo nga gin-file nanday Hontiveros kag anay Senator kag Blue Ribbon Committee chair Richard Gordon, kag Commission on Audit report sang 2020.#
