Nagtukod si President Ferdinand “Bongbong” Marcos Jr. sang special committee agud mapabakod pa ang proteksyon sa tawhanon nga kinamatarong sa pungsod.
Nakasaad ini sa Administrative Order No. 22 nga pirmado ni Executive Secretary Lucas Bersamin sang Mayo 8.
Ang Special Committee on Human Rights Coordination ang may mandato nga padayunon ang mga aktibidad kag accomplishments sang United Nations for the Joint Programme (UNJP) on Human Rights sa areas sang law enforcement, criminal justice, kag policy-making.
Magapamuno sa sini nga committee si Bersamin samtang co-chair naman si Justice Secretary Jesus Crispin Remulla.
Nalakip naman sa mga myembro sini amo ang mga tiglikom sang Department of Foreign Affairs (DFA) kag Department of the Interior and Local Government (DILG).
Nahibaluan nga ang Pilipinas ang isa ka state party sa pila ka international human rights instruments kaangay sang Universal Declaration of Human Rights, International Covenant on Economic, Social and Cultural Rights, kag International Covenant on Civil and Political Rights.
Naka-establisar man ang nasyon sang Presidential Human Rights Committee (PHRC) agud magpasad sang National Human Rights Action Plan kag agud siguruhon nga nagasunod ang pungsod sa mga obligasyon sini sa international human rights groups.
Nalakip sa mga function sang bag-o nga committee amo ang pag-imbestigar kag pagtipon sang mga datos sa ginaalegar nga paglapas sa tawhanon nga mga kinamatarong nga makomiter sang law enforcement agencies amo man ang pagpasangkad pa sang civic space kag engagement sa pribado nga sector.
Maga-implementar man ini sang human rights-based approach sa control sa iligal nga droga kag counter-terrorism.
Matandaan nga ang nagligad nga bulan, nag-report ang human rights organization nga Amnesty International (AI) nga ang extrajudicial killings (EJK) ang nagapadayon gihapon sa Marcos administration — baliskad sa panindugan ni President Marcos nga gin-island na sini ang concept sa anti-drug campaign, indi kaangay sa kontrobersyal nga “Oplan Tokhang” kag drug war ni anay Presidente Rodrigo Duterte.#
