Magasapol ang Inter-Agency Committee on Foreign Students subong nga adlaw, Mayo 13, agud maistoryahan ang pagdamo sang Chinese nationals nga nagatuon sa Pilipinas.
Suno kay Bureau of Immigration (BI) Commissioner Norman Tansingco, nag-request ini sang high-level meeting sang amo nga committee nga ginapamunuan sang Commission on Higher Education (CHED) matapos nagpanawagan ang Senado kag Kamara nga imbestigaran ang makaduluda nga pagdagsa sang Chinese students sa Tuguegarao City sa probinsya sang Cagayan.
Tion ini suno kay Tansingco agud nga mangin aktibo ang inter-agency sa mga diskusyon sa national security paagi sa paglakip sang security assessment bilang regular agenda sa mga meetings.
Sa review sang record sang ahensya, may yara sang 1,516 student visas nga nahatag sa Chinese nationals sa Cagayan nga lunsay gin-endorseo sang major Philippine university.
Suno pa sa immigration, gusto man klaruhon sa meeting ang papel sang kada ahensya sa pagtugot sang mga foreigners nga maggtuon diri sa Pilipinas.
Ang iban pa nga myembro sang inter-agency committee amo ang National Bureau of Investigation, National Intelligence Coordinating Agency, Department of Foreign Affairs, kag ang Department of Education.
Sang 2023, may yara sang 24,000 student visas nga naisyu ang immigration kun sa diin mayorya diri amo ang Chinese nationals nga may 16,190 visas kag kalabanan ang yara sa Metro Manila
Nahibaluan nga nangin sentro sang atensyon ini nga Chinese students sa Cagayan bangud sa amo man nga probinsya nakaplastar ang duha ka Enhanced Defense Cooperation Agreement (EDCA) sites nga amo ang Naval Base Camilo Osias kag ang Lal-lo Airport.
