ILOILO CITY- Patay ang lima ka tuig nga bata nga lalaki matapos ginlampusan sang bato sa ulo kag ginlumsan sang iya 14- anyos nga utod sa iloy sa Lapu-Lapu City, Cebu.
Base sa imbestigasyon sang otoridad, ang walo ka tuig nga utod sang duha amo ang nakakita sang insidente kag ginsugid ini.
Gilayon nga ginpangita ang biktima kag nakit-an ini sa dagat nga wala na sang kabuhi kag may mga pilas.
Sa imbestigasyon sang pulis, nagagwa nga akig ang solterito nga suspek sa iya nga step-father nga masami siya ginaakigan kag ang manghod sini ang iya ginpaukpan sang kaakig.
Bangud sa edad sang suspek, ginbutang ini sa homecare facility sang city social welfare department para ipaidalom sa intervention kag counseling.
