Mahimo mapasakaan sang kaso nga perjury si Bamban, Tarlac Mayor Alice Guo kun mapamatud-an nga indi ini Filipino citizen.
Ginpahayag ini ni Commission on Elections (Comelec) Chairman chief George Garcia sang ginpamangkot sa posibilidad nga peke ang mga dokumento nga ginpresentar ni Guo sang nagpadalagan ini sang 2022 elections.
Pahayag pa ni Garcia, gina-require lamang sang Comelec ang mga aspiring candidates nga magpasa sang certificate of candidacy kun sa diin ila ginadeklarar nga sila ang Filipino citizens.
“Wala pong nire-require ang batas na i-submit mo o dalhin mo ang nanay at tatay mo para patunayan na ikaw ay Filipino,” dugang sang poll body chair.
Gina-presume sang Comelec nga matuod ang deklarasyon sang aspiring candidates suno sa iya magluwas lang kun may yara na sang kaso sang disqualification ukon cancellation of candidacy nga na-file sang isa ka rehistrado nga botante.
Matandaan nga nangin agaw-atensyon ni Mayor Guo sang nagligad nga semana sang ginpatawag ini sa Senado kun sa diin ginapatigayon ang hearing kaangot sa Philippine offshore gaming operation (POGO) compound sa Bamban sa Tarlac kun sa diin siya ang nagapungko nga alkalde. Nagaguwa ang iya pangalan nga may kaangtanan sa amo nga POGO firm nga gin-raid sang otoridad sang Marso bangud sa ginaalegar nga human trafficking kag serious illegal detention.
Sa hearing, ginkwestyon ni Senator Risa Hontiveros ang identity sang alkalde bangud wala ini sang opisyal nga record nga mapakita nga isa siya ka Filipino. Diri man nasal-ot ang pamangkot kun isa ayhan ini ka Chinese citizen.
Ginsiling man ni Hontiveros nga nagbutig si Guo sang ginpanginwala sini ang koneksyon sini sa Hongsheng Gaming Technology, Inc.
Kun basehan ang pahayag sang senadora, naglutaw lamang ang pangalan ni Guo sang 2022 elections apang wala man ini sang hospital record kun sa diin ini nabun-ag kag wala man sang school records sa Pilipinas bangud gina-insister sini nga na-homeschool lamang siya kag indi na sini matandaan ang homeschool provider.
May yara lamang ini sang certificate of live birth kun sa diin nadeklarar nga isa ka Filipino ang iya amay, apang suno kay Hontiveros, baliskad ang nadeklarar sa business records bangud ginsaad nga Chinese national ang amay sini.
Nabuyagyag man nga ang registration of live birth ni Guo ang natabo sang nagaedad na ini sang 17-anyos.
Ginpyestahan man sang publiko ang video sang nasambit nga 37-anyos nga alkalde sa Senate hearing bangud sang ginapisa-pisa ini ni Senator Hontiveros sa mga pamangkot, wala ini sang madumduman sa mga personal nga detalye sa iya nga kabuhi.#
