Posible nga imbestigaran man sa Kamara si Mayor Alice Guo — ang alkalde sang Bamban, Tarlac nga agaw-atensyon sa hearing sang Senado bangud wala ini sang madumduman sa mga personal nga detalye sa iya nga kabuhi kag ginakwestyon na subong pati ang nationality sini matapos ginakuno-kuno nga isa ka Chinese citizen.
Sang nagligad nga semana sang ginpatawag ini sa Senado kun sa diin ginapatigayon ang hearing kaangot sa Philippine offshore gaming operation (POGO) compound sa Bamban sa Tarlac.
Nagaguwa ang iya pangalan nga may kaangtanan sa amo nga firm nga gin-raid sang otoridad sang Marso bangud sa ginaalegar nga human trafficking kag serious illegal detention.
Sa hearing, ginkwestyon ni Senator Risa Hontiveros ang identity sang alkalde bangud wala ini sang opisyal nga record nga mapakita nga isa siya ka Filipino.
Ginsiling man ni Hontiveros nga nagbutig si Guo sang ginpanginwala sini ang koneksyon sini sa Hongsheng Gaming Technology, Inc.
Kun basehan ang pahayag sang senadora, naglutaw lamang ang pangalan ni Guo sang 2022 elections apang wala man ini sang hospital record kun sa diin ini nabun-ag kag wala man sang school records sa Pilipinas bangud gina-insister sini nga na-homeschool lamang siya kag indi na sini matandaan ang homeschool provider.
May yara lamang ini sang certificate of live birth kun sa diin nadeklarar nga isa ka Filipino ang iya amay, apang suno kay Hontiveros, baliskad ang nadeklarar sa business records bangud ginsaad nga Chinese national ang amay sini.
Nabuyagyag man nga ang registration of live birth ni Guo ang natabo sang nagaedad na ini sang 17-anyos.
Sa Kamara naman, ginpahayag ni House Assistant Majority Leader kag AKO Bicol party-list Rep. Raul Angelo “Jil” Bongalon nga mahimo man maka-conduct ang lower chamber sang imbestigasyon sa amo nga alkalde.
Ginlaragway man sini nga seryoso kag maka-alarma nga isyu kun gina-alegar nga isa ka Chinese citizen ang nasambit nga opisyal.
“On the issue of Mayor Alice Guo, I guess it’s a possibility to have a parallel investigation here in House of Representatives. This is very serious and at the same time very alarming, because imagine, allegedly isa pong Chinese person, was able to register herself 17 years after na siya po ay ipinanganak, so late registration po ‘yung nangyari. These are very alarming. Kumbaga mina-manipula nila ang ating mga batas ang atin pong mga proseso dito sa ating bansa and dapat po matigil ito. This is a national security issue na kailangan pong pag bigyan at pagtuunan ng pansin ng ating gobyerno,” pahayag sini.
Nagpahanumdom man ini sa Commission on Elections (Comelec) nga salaon gid sang maayo ang mga kandidato para sa nagahilapit nga midterm elections.
Una naman nga nagpahayag ang poll body nga posible makasuhan sang perjury si Guo kun mapamatud-an nga nagbutig ini sang nagdeklarar ini nga siya isa ka Filipino citizen sang iya gin-file ang iya nga Certificate of Candidacy (COC). #
