ILOILO CITY- Ginmando ni Justice Secretary Jesus Crispin Remulla sa National Bureau of Investigation (NBI) nga imbestigaran ang iligal kag nagasupak sa layi nga mga aktibidad nga ginakumiter sang mga foreign diplomats.
Ini sa tunga sang ginaalegar nga mga recordings nahanungod sa isyu sa West Philippine Sea.
Suno kay Remulla, indi absolute ang diplomatic immunity kag responsibilidad sang foreign diplomats nga respetuhon ang layi kag regulasyon sang estado.
Una diri, gin-alegar nga gin-leak sang Chinese Embassy sa Manila ang transcript sang ginapahayag nga istoryahanay sa telepono sa tunga sang Filipino military official kag isa sa mga diplomats nahanungod sa “new model” agreement sa Ayungin Shoal.
Pahayag ni Remulla, sa idalom sang Vienna Convention on Diplomatic Relations, ang diplomats, employees sang international organizations, kag ang ila immediate family members ang sakop sang partikular nga degree sang diplomatic immunity sa tion sang ila pagtinir sa isa ka pungsod.
Apang sa amo nga convention, ang diplomatic immunity ang para lang sa opisyal nga akto nga ginhimo sa ngalan sang opisyal nga katungdanan nga kinahanglan para sa pagduso sang international nga policies kag interests.
Una na nga ginpahayag ni National Security Adviser Secretary Eduardo Año nga ang claim sang China ang wala nagakabagay kag wala sa rason.
Ginpahayag man sang Department of Foreign Affairs nga imbestigaran sini ang involvement sang foreign diplomats sa illegal activities kag nagpangako nga maghimo sang nagakaigo nga lihok.
Sa iya bahin, si Defense Secretary Gilberto Teodoro Jr. nagsiling man ang ang sin-o man nga responsable sa pag-record sang amo nga conversation ang dapat palayason sa Pilipinas.
