ILOILO CITY- Madinalag-on nga nabutang sang Atin Ito Coalition ang symbolic buoys kag mga markers nga may nakasulat nga “WPS, Atin Ito!” sa sulod sang exclusive economic zone (EEZ) sang Pilipinas.
Kasunod ini sang pagpadulong sang civilian convoy, kaupod ang 100 ka mga manugpangisda, nga naglayag pakadto sa Bajo de Masinloc agud magpatigayon sang resupply mission para sa mga manugpangisda sang Masinloc.
Nahibaluan nga kaina sang aga sang nagbiya ang amo nga civilian mission halin sa Zambales padulong sa Scarborough Shoal ukon Bajo de Masinloc sa West Philippine Sea (WPS).
Mayor nga katuyuan sini amo ang pagpatigayon sang ‘peace and solidarity regatta’ sa sulod sang exclusive economic zone sang Pilipinas.
Nanagtag man sang gasolina ang grupo sa mga Pilipino nga manugpangisda sa lugar.
Ang civilian supply mission ang ginabug-usan sang lima ka commercial fishing vessels kag 100 nga mas magagmay nga fishing boat.
Kalakip sa mga organisasyon nga nag- upod sa civilian mission amo ang mga sumusunod:
-New Masinloc Fishermen’s Associations
-Subic Commercial Fishing Association Incorporated
-Mabayo Agri Aqua Association in Bataan
-Pambansang Katipunan ng Samahan sa Kanayunan (PKSK)
-Pambansang Kilusan ng mga Samahang Magsasaka (PAKISAMA)
-Center for Agrarian Reform, Empowerment and Transformation (CARET)
-Akbayan Youth
-Student Council Alliance of the Philippines (SCAP)
Una nga nakapatigayon sang civilian mission ang Atin Ito sa West Philippine Sea sang 2022 nga may 40 participating nga mga baroto.
