ILOILO CITY- Sa pihak sang nabatyagan nga kalisod, nagmulumag-an ang balatyagon sang iloy sang solterito nga nag-utas sang kabuhi sa Maasin, Iloilo matapos nga nagpalab-ot sang pagpakig- unong sa ila si Vice President Sara Duterte.
Sa interview sang Bombo Radyo kay alyas Marie, iloy sang napatay nga Grade 10 student, iya ginpahayag nga naapresyar niya ang pagpakita sang simpatiya sang bise presidente paagi sa pagpadala sang bulak sang haya sang solterito.
Nagalaum naman ini nga paagi sa bulig sang bise presidente, mahatagan sang hustisya ang kamatayon sang iya anak.
Ginpahayag naman sang iloy nga wala pa nakaatubang sa ila ang manunudlo nga ginatudlo rason sang pagpanginmatay sang biktima.
Pahayag sang iloy, dayunon sa gihapon nila ang pagpasaka sang panumbungon batok sa manunudlo sa tion nga malubong na ang iya anak.
Nagalaum naman ang iloy sa pasalig sang Department of Education nga mangin patas sila sa pag-uyat sang kaso apisar nga katapo nila ang ginabasol nga maestra sa pagpanginmatay sang estudyante.
