ILOILO CITY- Kumbinsido ang iloy sang Grade 10 student nga nag- utas sang iya kaugalingon nga kabuhi nga wala na sang iban nga rason sa pagpanginmatay sang iya anak kundi ang manubo nga grado nga ginhatag sang iya maestra sa isa ka subject.
Sa interview sang Bombo Radyo kay alyas Marie, iloy sang napatay nga solterito, iya ginpahayag nga bilang iloy, nangin saksi gid ini kun paano na-depress ang iya anak bangud sa manubo nga grado sini.
Suno kay alyas Marie, ginaulu-uluhan man nila sang iya bana ang ila anak nga magpadayon lang sa pagtuon kag nakita man nila ang pagtinguha sang bata.
Apang suno sa iya, wala gid nasarangan sang iya bata ang epekto sang iya manubo nga grado rason nga nag-utas ini sang iya kaugalingon nga kabuhi.
Nanindugan man ang iloy nga handwriting gid sang iya bata ang nakit-an sa suicide note kag wala ini ginhimo- himo lang agud makapangita sila sang balasulon.
