Nabulgar nga naga-trabaho ang duha ka pulis bilang personal bodyguards sang isa ka Chinese national sang nag-inaway ang mga ini samtang yara sa exclusive subdivision sa Alabang, Muntinlupa City.
Wala pa ginsapubliko ang ila mga pangalan apang isa ka police corporal kag patrolman ang involved sa sini nga insidente nga lunsay myembro sang Philippine National Police- Special Action Force.
Pareho man sila nga nag-ako nga nagaserbe sila bilang personal bodyguards sang Chinese national nga nagapuyo sa isa ka subdivision sa Ayala Alabang area apang nagpamalibad na sa paghatag sang dugang nga mga detalye.
Gina-alegar nga nagsabtanay ang duha, nagtapungulay, naglagsanay kag bangud sa ginamo, gin-report sila sa otoridad kag gin-detain sa Muntinlupa City Police Station.
Suno kay Muntinlupa City Mayor Rozzano Rufino “Ruffy” Biazon, magabulig ang local government agud nga ma-verify kun ang employer sang duha ka pulis ang naangot sa Philippine Offshore Gaming Operations kag kun may iligal man ini nga aktibidad.
Gina-imbestigaran man subong ang duha ka pulis bangud sa Zamboanga kuntani ang ila nga deployment.
“Sa ngayon po ay under investigation sa aming opisina itong dalawang PNP member, so as of now iyon ang aming mako-confirm, and sila ay members ng support unit, support unit po ng PNP,” suno kay Muntinlupa Police Investigation and Detective Management Section chief Police Captain Riza Soledad.
Suno sa National Capital Region Police Office, pananglitan may mga pulis nga magaserbe para sa pribado nga mga indibidwal, dapat nga maka-secure anay sang approval halin sa chief sang Philippine National Police.
“We have a unit in the Philippine National Police, that is the PNP Security Group, PSPG. In this PSPG, sila ‘yung nagbibigay ng protective custody sa ating mga whether civilian or VIP security wherein itong binibigyan nila ng security, of course, ay mayroong threat in their lives,” suno kay NCRPO head P/Major General Jose Melencio Nartatez.
Ginkumpirma naman sang Special Action Force nga ila matuod myembro ang duha ka pulis kag iga-relieve anay ang mga ini sa pwesto samtang padayon ang imbestigasyon.
Magluwas sa kaso-administratibo nga ila ginapangatubang, ang duha ka pulis ang nagapangatubang man sang reklamo nga alarm and scandal bangud sa ila pagtapungulay.#
