Gin-aprubahan na sang Kamara sa third and final reading ang hagna nga ginduso agud nga amyendaran ang Rice Tariffication Law paagi sa pagbalik sa nahauna nga functions sang National Food Authority (NFA).
Kabug-usan nga 231 ka mga mamalidha ang nag-boto sang “yes” para sa House Bill No. 10381, tatlo ang negative, samtang isa ang nag-abstain sa persona ni Camarines Sur 3rd district Rep. Gabriel Bordado, Jr.
Pananglitan magpadayon sa paghulag kag mahimo nga isa ka layi, ginapahayag nga ini ang magabalik sang price stabilization kag supply regulation functions sang NFA.
Hatagan man sang otoridad ang Agriculture Secretary (kasunod sang rekomendasyon sang National Price Coordinating Council ukon Local Price Coordinating Council) nga magdeklarar sang food security emergency kun may kakulangan sa suplay, kag kun may sustained increase kag extraordinary increase sa presyo sang bugas.
Kun may yara sang food security emergency, mahimo makapanghilabot ang NFA kag makabaligya sang bugas paagi sa direkta nga pagbakal sini halin sa local farmers kag mangin last resort naman ang importasyon.
Pagatugutan man sini nga layi ang NFA nga i-regulate ang foreign investment sa rice kag corn industry.
Una na nga ginpahayag ni President Ferdinand Marcos Jr. nga sertipikahan sini nga “urgent” ang hagna para nga mapanubo gilayon ang presyo sang bugas nga subong yara sa P50 to P60 per kilo.
Nahibaluan nga ang Rice Tariffication Law ang nahimo nga layi sang tion ni anay President Rodrigo Duterte sang 2019 kun sa diin may unlimited entry sang imported rice.#
