Ginkumpirma sang Philippine National Police nga napaidalom sa restrictive custody ang duha ka myembro sang Special Action Force kag ila pito ka mataas nga mga opisyal matapos nadakpan nga nagtanyag sang indi otorisado nga escort services sa Chinese nationals.
Matandaan nga nadakpan ang duha nga sanday Corporal George Rojo Mabuti kag Patrolman Roger Ramos Valdez bangud nga nag-inaway kag nagtapungulay ang mga ini sa isa ka subdivision sa Muntinlupa City kag sang ulihi natukiban nga body guards sila sang Chinese national.
Nagmandu man ang city prosecutor’s office nga i-release sila anay samtang nga nagapadayon pa ang preliminary investigation sa ila natuga nga alarm and scandal.
Suno kay PNP chief information officer Col. Jean Fajardo, ang Chinese national nga ila ginaserbisyuhan ang ginapahayag nga opisyal sang Philippine offshore gaming operator (POGO) firm sa Ayala Alabang village.
Ang duha ka pulis ang gindala sa headquarters sang Special Action Force sa Fort Sto. Domingo sa Sta. Rosa City, Laguna.
Ang ila naman nga superior officers sa Zamboanga kun sa diin ang highest-ranked amo ang lieutenant colonel ang ginpaidalom man sa restrictive custody samtang nagapangatubang sang administrative cases.
Base sa reports, ang tropa sang Special Action Force ang nagabaton sang P40,000 monthly salary bilang POGO bodyguards kun sa diin katunga sini ang nagakadto sa ila nga mga superior apisar pa nga indi man sila otorisado nga maghatag sang security services sa kay bisan sin-o.
