ILOILO CITY-Nag-init ang ulo ni Senator Loren Legarda kay Bamban, Tarlac Mayor Alice Guo kadungan sang liwat nga pag-atubang sang kontrobersyal nga alkalde sa Senado.
Ini matapos ginpamangkot ni Legarda si Guo kun masarangan sini nga pamatud-an nga isa siya ka Filipino.
Apang, sulit-sulit lamang ang sabat ni Guo nga nagdako ini sa uma.
Suno kay Legarda, kaangay nga robot si Go bangud memoryado na sini ang iya sabat kag ginadiktahan lamang siya sang iya abogado.
Ginhingyo man ni Legarda si Guo nga maghambal sa Kapampangan, nga amo ang masami nga ginagamit nga lengguahe sa Bamban, apang nagsabat ang alkalde nga indi ini makahibalo bangud Tagalog ang ila ginagamit sa ila balay.
Ginpahambal man ini sa Chinese nga iya man nga ginsunod apisar nga ginsiling sini nga gamay lang ang iya nahibaluan nga Fookien.
Nanindugan man ini nga Filipino ang iya mother tongue.
