Maga-byahe si President Ferdinand Marcos, Jr. sa Brunei Darussalam kag sa Singapore sa masunod nga semana.
Ang state visit nga naka-schedule sa Mayo 28-29 amo ang magamarka sang 40 ka tuig nga diplomatic relations sa tunga sang Pilipinas kag nasambit nga Southeast Asian nation halin sang nagsugod ini sang 1984.
Sa inisyal nga mga impormasyon nga ginpaguwa sang Department of Foreign Affairs (DFA), natalana nga makigsapol si Marcos kay Sultan Hassanal Bolkiah nga amo ang Head of State sang Brunei, magapatigayon sang bilateral meetings, kag magapakigkita sa Filipino community sa Bandar Seri Begawan.
Suno kay DFA spokesperson Teresita Daza, tutukan sa diskusyon nanday Marcos kag Bolkiah ang economic cooperation ilabi na bangud kilala ang Brunei nga powerhouse kun pagahambalan ang enerhiya.
Pahayag naman ni Foreign Affairs Office of the Asian Pacific Affairs Assistant Secretary Aileen Mendiola-Rau, gina-finalize na sang ahensya ang texts para sa mga memorandum of understanding (MOU) nga pirmahan kadungan sang state visit nga nagalakip sang priority areas kaangay sang agriculture, food security, maritime cooperation, kag turismo.
Samtang, sa Mayo 31 naman, natalana nga i-deliver ni Marcos ang keynote address sa International Institute for Strategic Studies (IISS) Shangri-La Dialogue sa Singapore.
Ini nga dayalogo amo ang premier defense summit sa Asya kag ang speech naman ni Marcos amo ang magamarka sang pagbukas sang ika-21 nga edisyon sini nga dialogue.
Suno sa DFA, maayo ini nga platform para sa defense ministers, military chiefs, government officials, kag security experts sa bilog nga kalibutan agud hambalan ang regional kag global security challenges.
Daku ini nga bagay suno pa sa ahensya bangud si Marcos ang labing-una nga Filipino president nga magahatag sang keynote address sa sini nga dialogue.
Ginalauman nga may side meetings man nga matabo bangud magatambong man ang iban nga heads of state kag parliamentarians. Iban sa ginalauman nga maka-istorya sang Pilipinas amo si Singaporean Prime Minister Lawrence Wong kag President Tharman Shanmugaratnam.
