Siyam ka mga tawo ang napatay kag 121 ang napilasan sang nag-collapse ang stage sa Mexico kadungan sang isa ka campaign rally para sa presidential candidate nga si Jorge Álvarez Máynez.
Natabo ini sa northeastern city sang San Pedro Garza García kun sa diin ang ginatudlo nga rason amo ang hinali nga mabaskog nga hangin.
Ginkumpirma naman ni Governor Samuel García Sepulveda nga isa ka bata ang nalakip sa mga napatay, samtang ang iban naman nga pilason ang stable na kag ang iban nga nagapaidalom sa surgery.
Sa nagguwa nga footages, sang nag-collapse ang stage kag natumba ang daku nga video screen nga nahulog sa entablado kag sa audience area rason nga nagkinaran-karan ang mga tawo.
Kasunod sini, ginpahibalo ni Álvarez Máynez nga suspendido anay ang tanan nga campaign activities.
Ini nga 38-anyos nga congressman ang nagarepresentar sa center-left Citizens’ Movement party kag nahingadlan nga party candidate sang nagligad nga Enero sang nag-drop out si García Sepúlveda nga nagbalik naman sa iya katungdanan bilang governor.
Hunyo 2 ang eleksyon sa Mexico apang napatung-an sang kalakasan kaangay sang political violence kag assassinations.#
