Indi lamang suspension kundi dismissal gid ang gusto ni Philippine National Police (PNP) chief Police General Rommel Francisco Marbil para sa duha ka myembro sang elite unit nga Special Action Force (SAF) nga natukiban nga nagaserbe bilang security guards sang isa ka Chinese national.
Suno kay Marbil, ginmandu na niya ini sa Internal Affairs Service bangud indi na husto nga nagakaapektuhan ang PNP kag ang dignidad sang organisasyon.
Matandaan nga nadakpan ang duha nga sanday Corporal George Rojo Mabuti kag Patrolman Roger Ramos Valdez bangud nga nag-inaway kag nagtapungulay ang mga ini sa isa ka subdivision sa Muntinlupa City. Gin-padala sila sa police station bangud sa amo nga eskandalo.
Sang nausisa na, natukiban nga na-deploy sila sa Zamboanga City apang nag-ako nga nagatrabaho subong bilang personal bodyguards sang Chinese national sa Alabang, Muntinlupa City nga naangot pa sa Philippine offshore gaming operator (POGO) firm sa Ayala Alabang village.
Kasunod sang hitabo, sila kag ang ila superiors sa Zamboanga ang ginpaidalom sa restrictive custody. Base sa reports, ang tropa sang Special Action Force ang nagabaton sang P40,000 monthly salary bilang POGO bodyguards kun sa diin katunga sini ang nagakadto sa ila nga mga superior apisar pa nga indi man sila otorisado nga maghatag sang security services sa kay bisan sin-o.
Sa idalom sang pagsulundan sang PNP, ang Police Security Protection Group lamang ang authorized nga maghatag sang security sa authorized individuals.
