ILOILO CITY- Ginbawian gid sang kabuhi ang isa ka lalaki matapos nakabunggo sa poste sang kuryente ang ginamaneho nga motorsiklo sa Tacdangan, Cabatuan, Iloilo.
Wala pa nakila-an ang biktima apang base sa paglaragway sang otoridad, nagasuksok ini sang green nga t-shirt, pantalon, ginabanta nga nagataas sang 5’4”, kag ginabanta man nga nagaedad sang 35 tubtob 40.
Sa interview sang Bombo Radyo kay Police Captain Dionisio Estacio, hepe sang Cabatuan Municipal Police Station, iya ginpahayag nga base sa nakakita, halin sa area sang Janiuay ang biktima.
Suno kay Estacio, wala sang suga ang motor kag madasig man ang dalagan sini.
Sa subong, yara sa morgue sang Ramon Tabiana Memorial District Hospital ang bangkay sang lalaki.
