Nagapabilin gihapon sa Bangkok, Thailand ang lima ka mga Pinoy na nga nalakip sa mga pasahero sang eroplano sang Singapore Airlines nga naka-eksperyensya sang “severe extreme turbulence” sang nagligad nga Martes.
Suno kay Philippine Ambassador to Thailand Millicent Cruz Paredes, magapaidalom pa ang mga ini sa nagkalain-lain nga medical procedure.
May yara suno sa iya nga nag-angkon sang pilas sa ulo bangud nagbunggo ini sa kisame sang eroplano,may yara man nga nagapalanakit gihapon ang lawas, kag may yara man nga naka-schedule nga operahan.
Lakip sa ila suno kay Paredes amo ang mag-asawa nga Pinoy kag ila nga duha ka tuig nga bata. Safe ang bata bangud nga ginkup-an ini sang iya amay samtang naga-uyog ang eroplano kag sang daw halos nagalukso-lukso na ang aircraft, ang amay amo ang natungtungan sang iban nga mga pasahero.
May yara man sang 62-anyos nga Pinoy nga nalipong kag isa ka overseas Filipino worker (OFW) nga naga-trabaho sa Singapore nga amo ang nag-angkon sang fracture sa liog kag injury sa likod.
Sa pinakaulihi nga update sang Singapore Airlines, 61 ka mga pasahero ang yara pa subong sa Bangkok.
Una man nga ginpahayag sang Bangkok hospital nga kalabanan sa mga nasamaran nga tawo sa amo nga flight ang nagakinahanglan gid sang spinal surgery.
Matandaan nga isa ka 73-anyos nga British national ang napatay gid sang naeksperyensyahan sang Boeing 777 ang amo nga turbulence sang halin ini sa Heathrow airport sa London kag yara na sa Andaman Sea rason nga ginpatigayon ang emergency landing sa Bangkok.
