ILOILO CITY- Positibo ang mga transport cooperatives sa mangin epekto sang liwat nga pagpatuman na sang enhanced Local Public Transport Route Plan (LPTRP) sa Iloilo City umpisa subong nga adlaw.
Sa interview sang Bombo Radyo ky Rizalito Alido, Presidente sang Western Visayas of Alliance of Transport Cooperative and Corporation, Incorporated, iya ginpahayag nga sabat ini sa pagbakho sang mga drivers sang depampasahero nga jeep batok sa mga colorum nga salakyan.
Suno kay Alido, madugay man nila nga ginhulat ang pagpatuman sang route plan agud makahatag sang serbisyo sa mga pumuluyo paagi sa mga salakyan nga legal nga nagabyahe kag komportable sa mga pasahero.
Nahibaluan nga kadungan sang implementasyon sang enhanced Local Public Transport Route Plan, pangdakop ang mga nagabyahe nga traditional jeepneys nga wala sang sticker, nga nagakahulugan nga indi consolidated kag ginakabig nga isa ka colorum.
Nagtingob naman ang pwersa sang Land Transportation Franchising and Regulatory Board (LTFRB), Land Transportation Office (LTO), Iloilo City Police Office, kag Iloilo City Traffic Management Unit agud mapatuman sang malatalunsay ang enhanced route plan.
