Magabiya si President Ferdinand Marcos Jr. subong nga adlaw, Mayo 28, para magbisita sa Brunei Darussalam kag Singapore.
Ini na ang iya ika-26 kag ika-27 nga byahe sa luwas sang pungsod halin sang nagpungko siya sa posisyon sang 2022.
Ang state visit nga naka-schedule sa Mayo 28-29, 2024 amo ang magamarka sang 40 ka tuig nga diplomatic relations sa tunga sang Pilipinas kag Brunei halin sang nagsugod ini sang 1984.
Suno sa Department of Foreign Affairs (DFA), natalana nga makigsapol si Marcos kay Sultan Hassanal Bolkiah nga amo ang Head of State sang Brunei, magapatigayon sang bilateral meetings, kag magapakigkita sa Filipino community sa Bandar Seri Begawan.
Ginalauman nga tutukan sa diskusyon nanday Marcos kag Bolkiah ang economic cooperation ilabi na bangud kilala ang Brunei nga powerhouse kun pagahambalan ang enerhiya.
Samtang, sa Mayo 31 naman, natalana nga i-deliver ni Marcos ang keynote address sa International Institute for Strategic Studies Shangri-La Dialogue sa Singapore.
Ini nga dayalogo amo ang premier defense summit sa Asya kag ang speech naman ni Marcos amo ang magamarka sang pagbukas sang ika-21 nga edisyon sini nga dialogue.
Suno sa DFA, maayo ini nga platform para sa defense ministers, military chiefs, government officials, kag security experts sa bilog nga kalibutan agud hambalan ang regional kag global security challenges.
Daku ini nga bagay suno pa sa ahensya bangud si Marcos ang labing-una nga Filipino president nga magahatag sang keynote address sa sini nga dialogue. Ginalauman nga may side meetings man nga matabo bangud magatambong man ang iban nga heads of state kag parliamentarians.
