ILOILO CITY – Nagpauli nga nagahibi si Iloilo City Lone District Representative Juliene ‘Jamjam’ Baronda matapos ginpatyan sang sound system ni Punong Barangay Allan Juarez kadungan sang pagbisita sini sa Barangay Pali Benedicto, Mandurriao, Iloilo City.
Sa interview sang Bombo Radyo kay Mona Rose Gratis, staff sang kongresista kag anay Barangay Kagawad sa lugar, iya ginpahayag nga gin-imbitar sang iya utod nga si incumbent Kagawad Romina Gratis si Rep. Baronda nga magtambong sa TikTok Challenge, sa diin isa ini sa mga programa para sa ila annual fiesta.
Suno kay Mona Rose, wala siya naglaom nga personal nga matambong ang kongresista sa event bangud naghalin pa ini sa Boracay.
Apang sang manugtapos na ang event, nagtawag ang isa man sa mga staff ni Rep. Baronda nga mapadulong ini sa barangay.
Nakibot na lang sila nga samtang nagasaot si Rep. Baronda, gulpi lang nagsulod sa gym si Punong Barangay Juarez kag ginpapatay ang sound system.
Diri kag ginkumprunta ni Punong Barangay Juarez ang mag-utod nga Gratis kag ginhambalan nga wala sila nagarespeto sa iya bangud sa indi pagpahibalo nga mapadulong ang kongresista sa ila event.
Ini ang natabo mismo sa atubang sang mga pumuluyo kag ni Rep. Baronda.
Sa ulihi, ginpakamaayo na lang ni Rep. Baronda nga magbiya sa kahiwatan samtang nagatulo ang luha.
Nahibaluan nga si Punong Barangay Juarez ang supporter ni Iloilo City Mayor Jerry Treñas nga political rival ni Rep. Baronda.
